كيبان فيه كيدور باليخت ديالو فشواطئ سبتة.. اسبانيا كتحقق ففيديو منسوب للملك محمد السادس

كشف "تلفزيون سبتة" أن البوليس الاسباني فالمدينة المحتلة بدا التحقيقات ديالو على واحد الفيديو تم تداولو على مواقع التواصل الاجتماعي منسوب للملك محمد السادس، كيبان فيه بحال إلى هوا راكب فيخت بوردو، ودايز فالمنطقة العازلة بين الفنيدق وسبتة المحتلة، والناس كيسلمو عليه.
ناس كثار كيتساءلو على مواقع التواصل الاجتماعي واش فعلا هذا فيديو ديال الملك، وإلى كان هو واش الفيديو قديم ولا جديد، خصوصا وأنه صعيب يدوز من المنطقة العازلة أو حدا شواطئ سبتة فهذ الوقت اللي الحدود دسبانيا مسدودة مع المغرب، وقالو إلى كان قديم علاش اختيار هذ التوقيت بالضبط لنشر هذ الفيديو.
وكاين اللي شاف أن الفيديو ممكن يكون قديم، بحكم أنه كاينين تصاور الملك فاليخت ديالو قدام فسبتة، كتعود بعضها ل2014 فاش كان تمنع من دخول شواطئ المدينة المحتلة، وهذشي اللي خلا اسبانيا تعتذر بشكل رسمي على هذشي اللي وقع.
ونشطاء ففيسبوك تداولو على نطاق واسع، لبارح فالليل، فيديو كيقولو أنه دالملك محمد السادس، كيبان فيه دايز فشواطئ سبتة باليخت ديالو، والمغاربة السبتاوين كيحييوه ويقولو ليه "عاش الملك.. الله ينصرك.."، وهو كيرد عليهم التحية بيديه.