عصيد كيرد على الفايد والمشعوذين والعشابة: الصيام كيشكل خطر على صحة الناس فزمن كورونا

اعلن أحمد عصيد، الكاتب والباحث فالثقافة الأمازيغية، بللي مجموعة من الفقهاء كيروجو خطاب خطير ديال الشعوذة فهذ الفترة ديال فيروس كورونا المستجد، فاش كيقولو بللي الصيام ممكن يشافي من فيروس كورونا المستجد، فإشارة لمحمد الفايد بوصفه خبير فمجال التغذية.
وقال عصيد، ففيديو "لايف" ليه بثو لبارح ففيسبوك، بللي على العكس، يقدر الصيام يتسبب فمشاكل كبيرة للمصابين، ويقدر يهدد حياتهم، كيف كيهدد جميع الناس فهذ الفترة ديال انتشار الفيروس، بحكم ان حلقهم كيكون ناشف، وكيسهال على الفيروس أنه يدخل للرئة ديالهم إلى ما شربوش السوائل.
وقال عصيد بللي الأطباء كيقولو بللي الفيروس عوض ما يمشي للجهاز الهضمي، كيدوز مباشرة للجهاز التنفسي، وهكذا كيتصابو بيه الرئتين، إلى كان الحلق ناشف، وعلى هذشي كيخص يتم شرب السوائل على كل ساعة أو نصف ساعة لتفادي الإصابة بالفيروس.
وقال بللي الخوانجية كيضحدو هذشي اللي قالو الاطباء، وكيضربو العلم، وكيقولو عكس هذ الكلام، وكيحثو الناس على الصيام، على اعتبار أنه شفاء لكل داء ومقوي للمناعة، فيحين أن منظمة الصحة العالمية كتقول بللي حتى شي حاجة ما كتثبت انه فعلا علاج.
مجموعة من الخوانية، وخصوصا منهم أصحاب الفايد وهذوك اللي كيحلو فمهم بزاف، انتقدو الكلام اللي قال عصيد، وقالو بللي ماعندوش أساس علمي، لكنهم ماعارفينش بللي صوا الإنسان صام ولا ماصامش فهذشي ماغايشكل عليه حتى شي خطر، لكن إلى الناس تبعو نصائح الفايد فعلا وثاقو فيه، وصامو بغرض العلاج من كورونا، وامتنعو من القيام بشروط الوقاية الصحية اللازمة، يمكن تتدهور الحالة ديالهم، وهذشي يقدر يهدد حياتهم كَاع، حيت كورونا ما معاه لعب.