مسؤول فالديوانة فطنجة المتوسطي: تعطلنا فمعاينة وثائق المغاربة اللي رجعو من الطاليان حيت كان اكتظاظ كبير وحنا ما حبسنا حد فالميناء

فحديث “كود” مع مسؤول فالجمارك بمدينة طنجة حول مضمون الفيديو اللي انتشر على نطاق واسع فمواقع التواصل الاجتماعي ديال مغاربة جاو من الطاليان خوفا من فيروس “كورونا” المستجد، وبقاو محبوسين فالحدود ديال ميناء طنجة المتوسط وباتو ليلة كاملة، قال بللي هذشي مكاينش.
وزاد المسؤول، اللي رفض يذكر سميتو، كيقول بللي الديوانة ماحبسات حد، وبللي غير هذ الصباح راقبات الوثائق والباسبورات ديال المئات من المواطنين اللي جاو من الطاليان، “ومازالين غير شي 20 ولا 25 ديال الطوموبيلات اللي غايدوزو كلهم دابا، وكل واحد يمشي بحالو”، على حساب هضرتو.
وعلى السبب ديال التأخير فمعاينة الوثائق ديال المسافرين، قال المسؤول بللي هذشي وقع بسبب الاكتظاظ اللي كان لبارح بلليل، بحكم أنهم جاو 3 ديال الباطوات من الطاليان، اللخر كان لبارح فالعشية، و”كان من المتوقع أن الطاليان غادي تغلق الحدود على كَاع الدول، وغايتم تعليق الرحلات منها وإليها سواء البحرية أو الجوية، وهذشي علاش المغاربة بغاو يرجعو لبلادهم”، على حساب ما قال.
وأكد بللي إجراءات المراقبة الصحية فالميناء كانت متشددة بزاف على الناس اللي رجعو من الطاليان، “ضروري ما نراقبو الصحة ديالهم قبل ما يدخلو، والحمد لله تبين من خلال الفحصات بللي الناس اللي جاو مافيهمش كَاع اعراض الفيروس”، كيف قال المسؤول.
وكانوا مغاربة جاو من الطاليان سجلوا فيديو فحدود ميناء طنجة المتوسطي وتداولوه على نطاق واسع على مواقع التواصل الاجتماعي، كيقولو فيه انهم باتو ليلة كلها فالحدود، والجمارك مابغاتش تدوزهم باش يدخلو للبلاد.