ميدلت.. مجهولين قطعو شجر الغابة وسرقو الخشب ديالو فالظلام

عبروا سكان منطقة تونفيت، التابعة لجماعة ميدلت، اليوم الجمعة، على استنكارهم لقطع شجر الأرز باذمر أوبوهو فالقطاع الغابوي إيدكَل.
وفي اتصال “كود” مع بعض سكان المنطقة، قالوا بللي مجموعة من الأشخاص المجهولين قطعوا لبارح الخميس فالليل سبعة ديال الشجرات من الشجرات الكبار فالمنطقة، واللي عمرو سنوات، وسرقو الخشب ديالها فالظلام وما شافهم حد.
ورجحوا السكان يكونوا صحاب الفعلة جاو من الجماعة الحدودية أغبالة آيت سخان التابعة لإقليم بني ملال.
وطالبو السكان مصالح المياه والغابات فالمنطقة باش تدخل على الخط، وتحضي الغابة من بحال هذ الأمور، كيف طالبو السلطات باش تفتح تحقيق فالموضوع اللي اعتبروه “جريمة بيئية كتهدد الغابة ومستقبل الناس ديال الأطلس ككل”.
وهذي ماشي أول مرة يوقع هذشي، حيت غير قبل شي أيام لقاو سكان المنطقة بزاف ديال الشجر وهرس ومكَلع من بلاصتو.