القضية ديال “مثلي مراكش” كتكبر.. الوكيل العام يستدعي البوليس لي خدا الحموشي قرارات فحقهوم والضحية خدا شهادة طبية من بسيكياتر

omarelmouzaine@gmail.com
علمت “كود”، من مصادر مطلعة، أن الوكيل العام للملك لدى محكمة الاستئناف بمدينة مراكش، قرر اليوم الثلاثاء، استدعاء داك البوليس لي كان المدير العام ديال الأمن الوطني خدا قرارات تأديبية فحقهم بسبب تسريب وثائق خاصة ديال “مثلي مراكش” لي انتهكو الحرية ديالو وحطو من كرامتو نهاية رأس السنة.
وحسب المصادر نفسها، ل”كود”، فإن الوكيل العام ديال مراكش استمع اليوم إلى “مثلي مراكش”، وأكد ليه بالتفاصيل شنو وقع ليه داك الليلة ديال راس العام، وقدم ليه حتى شهادة طبية فيها 3 أشهر، حصل عليها من طبيب نفساني.
وجاء هاد التطور أيام قليلة من إصادر المدير العام ديال مديرية البوليس، عبد اللطيف حموشي، عقوبات تأديبية تنوعات ما بين التوقيف المؤقت عن العمل والتوبيخ وحتى الإنذار فالحق ديال 4 مسؤولين كيخدمو فولاية أمن مراكش.
هاد البوليس عندهوم رتبة ديال عميد شرطة إقليمي وعميد ممتاز وضابط أمن ممتاز وضابط أمن. المديرية قالت على أنه أخلوا بالتزاماتهم المهنية وعدم اتخاذهم التدابير الاحترازية اللازمة للمحافظة على المعطيات الشخصية الخاصة بشخص كان موضوع بحث تمهيدي في قضية حادثة سير بدنية، في إشارة منها للقضية ديال “مثلي مراكش”.