من البدية يبان العربون. المخرج المعروف ديل طورو مع تييري فريمو مول “كان” فضلو بجگلني باش ياكلو الصوصيص والكفتة على سهرة الافتتاح فسوفيتيل

تدوينة صغيرة من عبد الله ترابي الصحافي مقدم ومعد برنامج “حديث مع الصحافة” وناشر “تيل كيل” سابقا ورئيس تحرير “زمان” بينات على بعض من غرابة افتتاح مهرجان مراكش الدولي للفيلم.
الصحافي داخل من كازا لمراكش معطل وداز لعند بجگلني يتعشى. دخل مع منتصف الليل وشكون لقى؟ المخرج المعروف گييرمو ديل طورو ومعاه تييري فريمو الرئيس المنتدب لمهرجان “كان”. بجوجهم فضلو اشهر واحد كيبيع الشوا وخصوصا بالليل على سهرة الافتتاح اللي كانت ففندق سوفيتيل بمراكش.
حسب ما علمته “كود” فالنجمين. حقاش بجوج نجوم ديال بصاح واخا فريمو ما كيديرش الاخراج ولا التمثيل٬ كلاو الكفتة والصوصيص.
ممكن شي حد يقول ويي هادي هي مراكش. اييه مراكش زوينة ولكن هادو جاو للمهرجان. جاو يشوفوهم الناس يتلاقاوهم يتكلمو معاهم يحكيو معاهم يستافدو منهم. من النهار الاول جاهم الملل وما عجبهمش هاداك العالم اللي حافظينو وقلبو على شي حاجة مختالفة. ما لقاوهاش فالمهرجان بل فالمدينة