برلماني سابق ف الناظور استاقل من الب جي دي باش ينافسو ف الحركة الشعبية ف الانتخابات التشريعية

أعلن النائب البرلماني السابق عن حزب العدالة والتنمية ف الناظور، نورالدين البركاني، أنه بعدما قدم استقالتو من حزب "اللامبة" غادي يدخل ينافسو ف الانتخابات التشريعية بحزب الحركة الشعبية.
وقال البركاني، ف تدوينة نشرها ف "فيسبوك"، أنه بعدما رفض العرض اللي قدمو ليه حزب الاستقلال، قبل العرض الثاني اللي جاه من عند حزب "السبلة" حيت عطاه التزكية باش اترشح للبرلمان.
https://www.facebook.com/1286484220/posts/10225998359807355/
وكان نورالدين البركاني، أعلن الاستقالة نتاعو من حزب العدالة والتنمية بلا ما يكشف عن الأسباب اللي خلاتو ياخذ هذ القرار، لكن بعدما قال أنه غادي يدخل الانتخابات بحزب "السبلة" تبين أن سبب الاستقالة هو التزكية د البرلمان.
ويرى متتبعون، أن حزب العدالة والتنمية ف جهة الشرق ك يعيش مشاكل كبيرة، خاصة وأن مطرودين من البيجيدي ف وجدة غادي اترشحو بلائحة مستقلة باش انافسو حزب "اللامبة"، ف حين حركة التوحيد والإصلاح ف وجدة تاهي غادي تقاطع لائحة "المصباح"..وهاد الشي ك يبين بللي إخوان الامس ولاو أعداء اليوم.