رمضان فالدار. المصممة سهام سلطانة ل"كود": مامولفاش نخرج بزاف فرمضان.. وواخا الحجر الصحي الخير موجود

كل يوم "كود" غدي تسول فنانين ومشاهير على كيفاش كيدوزو نهارهم مع الحجر الصحي فرمضان.
واليوم معانا المصممة المغربية سهام سلطانة اللي عاودات ل"كود" على الروتين ديالها اليومي فهذ الشهر ،وقالت "أنا مكانخرجش بزاف أصلا فرمضان، ومع دابا كاين الحجر الصحي، وحنا ملتازمين كثر، ومتبعين التعليمات والنصائح الاحترازية اللي وصاتنا بيها وزارة الصحة، وانا حتى إلى خرجت كنخرج غير باش نتقضى شي حاجة وكنرجع دغيا لداري".
وأكدات بللي كلشي متوفر على مستوى المنتوجات الغذائية، وماحساتش بزاف دالفرق هذ العام مقارنة مع الأعوام اللي فاتو واخا كاين الحجر الصحي.
وبالنسبة لبروكَرامها فالنهار كتقول: "كنفيق فالصباح، كنراجع مع ولادي شوية الدروس ديالهم، وكندخل للكوزينا، إلى كانو البنات اللي كيعاونوني كيتكلفو بالتوجاد وإلى ما كانوش كنتكلف أنا، مرة مرة راجلي حتى هو كيدير شي حاجة، كنتسناو المغرب، كنفطرو، وفالليل كنصليو وكنتفرجو فالمسلسلات والبرامج اللي دايرين فقنواتنا المغربية".