رمضان فالدار. أحمد شوقي ل"كود": كنمارس التمارين الرياضية مع الوليدات ونعاونهم فقرايتهم ونطيب.. وحنا ملتازمين بالحجر الصحي

كل يوم "كود" غدي تسول فنانين ومشاهير على كيفاش كيدوزو نهارهم مع الحجر الصحي فرمضان.
واليوم معانا المغني المغربي أحمد شوقي اللي تكلم مع "كود" على اليوميات ديالو فهذ الشهر، وقال بللي كين فرق كبير هذ العام حيت الناس مابقاتش كتخرج من الدار، والأمور تبدلات، لكن هذشي ما كيمنعش من أنه يزاول الأنشطة اللي كيبغي، كيقول "هذ العام مع هذ الشهر فهذ المرحلة كنوضو فالصباح، كنديرو التمارين معا الولاد سوا مدرسية ولا حتى الرياضية، كندخل شوية للكورينة كنطل، إلى قدرت ندير شي حاجة كنديرها حيت كيعجبني نطيب، وصافي من بعد كنتفرج فالمسلسلات وكنهضر شوية مع العائلة حتى كتجي المغرب".
وزاد شوقي كيقول "كنا شحال هذي كنخرجو مع الدراري صحابنا، دابا لا كنكَلسو وكنديرو أنشطتنا فالدار، كنقدو نلعبو الكارطة ولا البارتي ولا بليستيشن، بالنسبة للصلا كنصليو مع بعضيتنا، وكنبقاو نتفرجو حتى للسحور وهكذا دواليك".
وقال بللي هذ الأنشطة كيديرها كل رمضان، "لكن الفرق فالحجر الصحي ماكايناش إمكانية نخرجو عند صحابنا، داكشي علاش كنستعملو الفيديو كال، وكنعيطو لبعضنا غير هكا"، على حساب كلامو.