شاب كاعي حيت مريض وخايف لا يكون شدو "كورونا" فسونتر دابيل.. ومسؤول ل"كود": مايمكنش نخدمو كاع الناس من ديورهم وحنا محتارمين شروط السلامة الصحية

حط شاب خدام فسونتر دابيل على الحساب ديالو الشخصي فموقع التواصل الاجتماعي "فيسبوك" تدوينة، كيحكي فيها على الحالة ديالو الصحية المتدهورة، من بعدما كان خدام من البيرو فسونتر دابيل معروف فكازا.
المريض دار تدوينة على حسابو الشخصي فموقع التواصل الاجتماعي "فيسبوك"، نشرها لبارح فالعشية، كيقول فيها أنه عمرو يسمح لأي واحد مسؤول فهذ ليسونتر دابيل اللي كيخدمو الناس من مقرات العمل واخا كاين خطر كبير على صحتهم مع انتشار هذ الوباء.
وكيقول الشاب، اللي رافق تدوينتو بصورة ليه وهو كيبكي، بللي درجة الحرارة ديالو طلعات ل40، وعندو ضيق حاد فالتنفس، حتى شك واش يقدر يكون مرض بفيروس "كورونا"، لكنه لحد الساعة مزال مادار التيست باش يعرف اشنو عندو بالضبط، لكنه دوز عند الطبيب وخدا الدوا.
فتعليقو على هذشي، قال مسؤول على التواصل فالسونتر دابيل اللي خدام فيه الشاب بللي هذ السونتر واخد جميع الاحتياطات ديالو لضمان شروط السلامة الصحية، وحسس الأجراء بالسلوكات الوقائية اللي خاصها تدار، ويخليو بيناتهم مسافة الأمان الكافية باش مايتعاداوش، ونقص من عدد الأشخاص اللي خصهم ياخدو لاسونسور.
قال المسؤول، فحديثو ل"كود"، بللي السونتر كيعقم المكاتب ديالو بشكل مستمر، وكلف أطباء باش يراقبو الحالة الصحية اللي خدامين معاهم، كيف وضع كاميرات حرارية فالدخلة ديال المكاتب، وقسم الناس اللي خدامين لمجموعة تخدمة بالليل ووحدة بالنهار باش ينقص من أعداد المتواجدين فالبيروات، وشوية بشوية غادي يولي كلشي يخدم من الدار، لكن دابا مزال مكاينة هذ الإمكانية.
ونفى نفس المتحدث الكلام اللي قال الشاب فالفايس، على اعتبار أن السونتر ماشي مسؤول على المرض ديالو، لأنه داير جميع التدابير الوقائية "اللي ممكن مكايناش فسونطرات خرين"، على حساب هضرتو.