نصير مزراوي كيتدرب مع الأسود لأول مرة فكوب دافريك والركراكي واللاعبين كيوجدو لزامبيا فأجواء زوينة

رجع الدولي المغربي نصير مزراوي لتداريب المنتخب الوطني المغربي، بعدما برًا من الإصابة اللي كانت جاتو قبل أسابيع مع الفريق ديالو بايرن ميونخ الألماني.
وكيفما كان حاسب الطاقم الطبي ديال المنتخب المغربي، رجع الدولي المغربي نصير مزراوي للتداريب الجماعية ديال الأسود قبل الماتش الثالث فكوب دافريك، وشارك اليوم الثلاثاء فالحصة التدريبية الأخيرة قبل ماتش المغرب وزامبيا اللي غيتلعب غدا الأربعاء فسان بيدرو، ضمن الجولة الثالثة من كوب دافريك، وكانت حالة ديالو مزيانة وكتريني عادي مع الكروب.
وديما مع أخبار المنتخب المغربي، اللي كيدير دابا الحصة التدريبية الأخيرة قبل ماتش زامبيا فتيران التداريب فسان بيدرو، كاع اللاعبين حاضرين فالتداريب وسط أجواء زوينة، والمورال طالع للعناصر الوطنية اللي كيبانو متحريرن حسب ما عاينت كاميرا گود، خصوصا بعد ضمان التأهل إلى ثمن النهائي، ولكن مركزين باش يربحو زامبيا ويضمنو صدارة الگروب السادس ويبقاو فسان بيدرو.