ها الحالة الصحية ديال غانم السايس قبل ماتش المغرب وفرنسا من بعدما توعت ضد البرتغال

رجع غانم سايس الكابيتان ديال المنتخب الوطني للتدريب ديال المنتخب الوطني المغربي وكان حاضر اليوم اليوم الثلاثاء فالحصة التدريبية الأخيرة قبل ماتش نصف نهائي كأس العالم قطر غدا ضد فرنسا بطلة العالم.
وحسب ما شاف موقع "كود" اللي كان حاضر فالحصة التدريبية هاد العشية فتيران الدحيل فالدوحة القطرية، فكان المدافع غانم سايس متواجد فالتداريب بدا كيجري بوحدو فالتيران فالاول ومن بعدها إلتحق بالكروب وبدا كيتدرب مع اللعابا، الشي اللي كيأكد أن الحالة الصحية ديالو صبحت بخير.
وكان غانم سايس توعت فالماتش الماضي ديال المنتخب الوطني المغربي ضد البرتغال فربع نهائي كأس العالم وخرج بعد بداية الشوط الثاني بدقائق، الشي اللي جعل الجمهور المغربي متخوف من الغياب فنصف النهائي ضد فرنسا لكن المشاركة ديالو فالتداريب الأخيرة غادي تمنح الثقة للزملاء ديالو والطاقم التقني والجمهور المغربي.