من المنتظر يتدربو عدد من اللعابا ديال المنتخب الوطني المغربي بوحدهم اليوم الاثنين، فأول حصة تدريبية ليكيب ناسيونال قبل نصف نهائي كأس العالم قطر 2022، وما غاديش يديرو تمارين مع لكروب بسبب الإصابات، فحصة تدريبية مغلقة بدون حضور وسائل الإعلام. وغادي يتدرب المنتخب الوطني المغربي هاد العشية فتيران الدحيل من بعدما استافدو اللعابا البارح الأحد من يوم راحة، عطاه لهم الناخب الوطني وليد الركراكي باش يرتاحو من لعيا ديال ماتش البرتغال. وبالنسبة للعابا اللي غادي تكون عندهم تداريب انفرادية فكيتعلق الأمر بكل من الكابيتان ديال ليكيب ناسيونال غانم سايس اللي خرج موعت فالماتش اللي فات ديال ربع النهائي ضد البرتغال، ونايف أكرد ونصير مزراوي واللي ما لعبوش الماتش اللي فات ضد البرتغال، حيث توعتو فماتش ثمن النهائي ضد إسبانيا، وإلى جانب الثلاثي المذكور فغادي يتدرب كل من يوسف النصيري وحكيم زياش وأشرف حكيمي بوحدهم، حيث حتى هما عندهم إصابات أقل حدة ولكن كتطلب الحذر الشي اللي غادي يخليهم ما يديروش التمارين مع المجموعة. وكيسعى الطاقم الطبي ديال المنتخب الوطني المغربي بقيادة عبد الرزاق هيفتي والمعدين البدنيين، لتجهيز اللاعبين المذكورين باش يكونو حاضرين فنصف نهائي كأس العالم الأربعاء المقبل ضد فرنسا، فالوقت اللي غادي يكون على الناخب الوطني وليد الركراكي والطاقم التقني ديالو يلقاو الحل كيفما تعودو على هادشي فليماتش اللي فاتو وأخرها ضد البرتغال فربع النهائي ملي غاب نصير مزراوي ونايف أكرد بسبب الاصابات، وخرج غانم سايس وسط الماتش ملي توعت ونفس الشي بالنسبة لحكيم زياش.
