غادي يستافدو اللعابا ديال المنتخب الوطني المغربي من عطلة من بعدما ربحو البرتغال فربع نهائي كأس العالم قطر 2022، وحققو إنجاز تاريخي وغير مسبوق فتاريخ الكرة المغربية والإفريقية والعربية بالوصول إلى نصف نهائي المونديال، اللي غادي يلعبو فيه ضد فرنسا بطلة العالم. وقرر الناخب الوطني وليد الركراكي والطاقم التقني ديالو يعطيو مكافأة للعابا فالمنتخب الوطني المغربي من بعد الماتش البطولي اللي دارو قدام البرتغال واللي ربحوه بواحد لزيرو، وبتأهل تاريخي لنصف نهائي كوب ديموند ومنحوهم يوم راحة، وماغاديش يتدرب المنتخب الوطني المغربي اليوم الأحد باش يرتاحو اللعابا ويرجعو الأنفاس ديالهم ويبدلو الجو شويا، خصوصا أن الماتش ديال البارح، كان فيه الريتم طالع بزاف ودارو فيه اللعابا مجهود بدني كبير. وكتعرف الصفوف ديال المنتخب الوطني المغربي عدد من الإصابات، كان آخرها غانم سايس واللي ما قدرش يكمل الماتش ضد البرتغال بسبب الإصابة فالوقت اللي كل من نايف أكرد ونصير مزراوي ما لعبوش حيث كانوا موعتين من ثمن النهائي ضد إسبانيا، الشي اللي كايعني أن الطاقم الطبي بقيادة عبد الرزاق هيفتي إلى جانب المعدين البدنيين كتسناهم خدمة كبيرة مرة أخرى فهاد اليومين اللي جايا باش يوجدو اللعابا لنصف نهائي كأس العالم قطر 2022. وبالنسبة لوليد الركراكي والطاقم التقني ديالو فغادي يكونو مطالبين يلقاو الحلول والبدائل فحالة تأكد غياب أحد اللاعبين ضد فرنسا فنصف النهائي الأربعاء الجاي.
