الركراكي وولادو سدو عليهم وبداو كيوجدو للبرتغال

غادي يبدا المنتخب الوطني المغربي اليوم الخميس، يوجد للماتش الجاي فربع نهائي كأس العالم قطر 2022، ضد منتخب البرتغال واللي غادي يتلعب فتيران الثمامة فالعاصمة القطرية الدوحة.
المنتخب الوطني المغربي ومن بعدما استافدو اللعابا ديالو من يوم راحة البعد مكافأة لهم من بعدما ربحو ماتش إسبانيا فثمن النهائي وتأهلو للربع، غادي يديرو اليوم أول حصة تدريبية إستعدادا للماتش الجاي ضد البرتغال، وكيف ما العادة ديال الناخب الوطني وليد الركراكي والطاقم ديالو مع اقتراب كل ماتش كيحاولو يبعدو اللعابا ديال المنتخب الوطني المغربي من الضغط و يخليهم مركزين، وحيث بقات 48 ساعة للماتش ضد إسبانيا، قررو تكون الحصة التدريبية ديال اليوم الخميس مسدودة وبعيدة على وسائل الإعلام.
ومن المنتظر يكشف الناخب الوطني وليد الركراكي للعابا فالحصة التدريبية ديال اليوم اللي غادي تكون فالعشية فتيران الدحيل، على النهج التكتيكي اللي غادي يلعبو به ضد منتخب البرتغال، وهو أمر كيتطلب تركيز وأيضا إبعاد أي واحد غريب على بعثة المنتخب الوطني المغربي من تيران التداريب تفاديا لتسريب أي معلومة للخصم، خصوصا وأن هاد الحصة وهي ما قبل الأخير غادي تعرف تحليل ودراسة المنافس من جميع الجوانب وتعريف اللعابا المغاربة بنقاط القوة والضعف ديالو وكيفاش غاديين يتعاملو معه فالماتش.
وغادي يلعب المنتخب الوطني المغربي نهار السبت الجاي ضد منتخب البرتغال فثمن نهائي كأس العالم قطر 2022، فتيران "الثمامة"، فماتش حاسم للأسود باش يمشيو بعيد فهاد البطولة والرباح فيه كيساوي التأهل لنصف النهائي ومواصلة كتابة التاريخ فهاد النسخة من كوب ديموند من بعدما تأهلو فيها لربع النهائي لأول مرة فتاريخ كرة القدم المغربية، أما الخسارة كتعني توديع البطولة من الدور الثاني.