الركراكي دخل اللعابا فالتركيز على ماتش بلجيكا وسد الباب على البركاكة

بدا المنتخب الوطني المغربي كيدخل فجو التركيز استعدادا للماتش الجاي ضد منتخب بلجيكا الأحد الجاي فالجولة الثانية من دور مجموعات كأس العالم 2022.
الناخب الوطني وليد الركراكي بغى يبعد اللعابا ديال المنتخب الوطني المغربي من الضغط ويخليهم مركزين حيث بقات 48 ساعة للماتش ضد بلجيكا، الشي اللي خلاه يقرر تكون الحصة التدريبية ديال اليوم الجمعة مسدودة وبعيدة على وسائل الإعلام.
الحصة التدريبية ديال اليوم اللي غادي تكون فالعشية فتيران الدحيل، من المنتظر يكشف فيها الناخب الوطني وليد الركراكي للعابا على النهج التكتيكي اللي غادي يلعبو به ضد منتخب بلجيكا، الشي اللي كيتطلب تركيز وأيضا، إبعاد أي واحد غريب على بعثة المنتخب الوطني المغربي تفاديا لتسريب المعلومات للخصم.
للإشارة فالمنتخب الوطني المغربي غادي يلعب ضد بلجيكا الأحد الجاي ماتش مصيري مع 2 ديال النهار، واللعابا مطالبين بتحقيق الرباح باش يقويو حظوظ ليكيب ناسيونال فالتأهل للدور الثاني من كأس العالم قطر 2022، من بعدما تعادلو فالجولة الأولى ضد كرواتيا.