الركراكي واولادو سالاو الاستعدادات لإسبانيا ومعولين يتورخوها (تصاور)

عرفت الحصة التدريبية الآخيرة ديال المنتخب الوطني المغربي قبل من ماتش ثمن نهائي كأس العالم قطر 2022، ما بين الأسود وإسبانيا حضور جميع اللعابا اللي باغيين يدخلو غدا الثلاثاء، التاريخ بالتوني المغربي ويتأهلو لأول مرة فتاريخ الكرة المغربية لربع نهائي كوب ديموند.
وشرف الناخب الوطني وليد الركراكي والطاقم التقني ديالو على آخر حصة ديال المنتخب الوطني المغربي قبل ماتش إسبانيا واللي تجرات هاد العشية فتيران الدحيل، وكانت الأجواء حماسية، وشاركو جميع اللعابا فالحصة، اللي كانت فيها الأمور طبيعة وكلشي مزيان ووضع فيها الركراكي مع اللعابا آخر اللمسات قبل ما يلعبو مع المنتخب الإسباني.
كتدخل المباراة ما بين المغرب وإسبانيا للي غادي تجرى فتيران المدينة التعليمية وهو تيران صغير على الثمامة والبيت اللي لعب فيهم المنتخب الوطني الدور الأول، (كتدخل) لحساب ثمن نهائي كأس العالم قطر 2022، وغادي يبدا الماتش مع 4 لعشية بالتوقيت ديال المغرب.