الركراكي جمع اللعابا وسد عليهم وبدا يوجد لإسبانيا

بدا المنتخب الوطني المغربي من البارح السبت كيدخل فجو التركيز استعدادا للماتش الجاي فثمن نهائي كأس العالم قطر 2022، ضد منتخب إسبانيا الثلاثاء الجاي، وهو ماتش مهم وحاسم والرباح فيه كيعني التأهل لربع نهائي البطولة، والخسران كيساوي الإقصاء، وغادي تدير ليكيب ناسيونال حصة تدريبية جديدة اليوم الأحد.
وكيفما تعود وليد الركراكي الناخب الوطني والطاقم ديالو مع اقتراب كل ماتش كيحاولو يبعدو اللعابا ديال المنتخب الوطني المغربي من الضغط ويخليهم مركزين، وحيث بقات 48 ساعة للماتش ضد إسبانيا، قررو تكون الحصة التدريبية ديال اليوم الأحد مسدودة وبعيدة على وسائل الإعلام.
ومن المنتظر يكشف الناخب الوطني وليد الركراكي للعابا فالحصة التدريبية ديال اليوم اللي غادي تكون فالعشية فتيران الدحيل، على النهج التكتيكي اللي غادي يلعبو به ضد منتخب إسبانيا، وهو أمر كيتطلب تركيز وأيضا إبعاد أي واحد غريب على بعثة المنتخب الوطني المغربي من تيران التداريب تفاديا لتسريب أي معلومة للخصم، خصوصا وأن هاد الحصة، وهي ما قبل الأخيرة، غادي تعرف تحليل ودراسة المنافس من جميع الجوانب وتعريف اللعابا المغاربة بنقاط القوة والضعف ديالو وكيفاش غاديين يتعاملو معه فالماتش.
وغادي يلعب المنتخب الوطني المغربي نهار الثلاثاء الجاي ضد منتخب إسبانيا فثمن نهائي كأس العالم قطر 2022، فتيران المدينة التعليمية وهو ماتش حاسم للأسود باش يمشيو بعيد فهاد البطولة والرباح فيه كيساوي التأهل لربع النهائي والخسارة كتعني توديع البطولة من الدور الثاني.