المنتخب بدا كيوجد لماتش اسبانيا

غادي يبدا المنتخب الوطني المغربي يوجد لماتش ثمن نهائي كأس العالم قطر 2022، ضد منتخب الصبليون إبتداء من اليوم السبت.
وبرمج الناخب الوطني وليد الركراكي اليوم الحصة التدريبية الأولى ديال المنتخب الوطني المغربي من بعد الماتش اللي كان ضد كندا فالدور الأول الخميس اللي فات.
وغادي تبدا الحصة التدريبية اليوم مع 4 ديال لعشية فتيران الدحيل، وهي حصة غادي يركز فيها الطاقم التقني للمنتخب على الجانب البدني وحيدو لعيا من اللعابا، فالوقت اللي غادي يركز فيها الطاقم الطبي على جاهزية اللعابا اللي كانوا مصابين وفين وصلات الحالات ديالهم.
وكان المنتخب الوطني المغربي استفاد من البارح الجمعة يوم عطلة من بعد ماتش كندا، حيث قرر الناخب الوطني يعطي الراحة للعابا من بعد المجهود لكبير اللي دارو فالدور الأول من كأس العالم، و اللي تأهلو فيه لثمن النهائي وغادي يلعبو ضد الصبليون الثلاثاء الجاي فتيران المدينة التعليمية.