بحضور لقجع.. ها شنو واقع فالحصة التدريبية الأخيرة ديال المنتخب قبل ماتش البرتغال

بدات عشية اليوم الجمعة، الحصة التدريبية الأخيرة ديال المنتخب الوطني المغربي قبل ماتش ربع نهائي كاس العالم قطر 2022، ضد البرتغال وكتعرف حضور جميع اللعابا ولكن ماشي كاملين مشاركين فالتداريب الجماعية.
وكتعرف الحصة التدريبية فتيران الدحيل فالعاصمة القطرية الدوحة، حضور 26 لعابا ديال المنتخب الوطني المغربي ولكن 22 كيتدربو بشكل عادي كمجموعة، فالوقت اللي 4 ديال اللعابا كيتدربو بوحدهم، وسط أجواء حماسية بين العناصر الوطنية والطاقم تقني بقيادة وليد الركراكي وحضو فوزي لقجع رئيس الجامعة الملكية المغربية لكرة القدم باش يساندهم.
وبالنسبة للعابا ال4 اللي كيتدربو بوحدهم فكيتعلق الأمر بكل من المهاجم القناص يوسف النصيري والكابيتان غانم سايس، وصاحبو فالدفاع نايف أكرد، وأيضا أشرف حكيمي، مع العلم أن الناخب الوطني وليد الركراكي تحدث فالندوة الصحافية ديالو اليوم اللي كتسبق ماتش المغرب والبرتغال ولمح لوجود إصابات، وأكد أن المنتخب عمرو ما كان جاهز 100% ملي بدا كأس العالم، وأنه غادي يلقاو الحلول فحالة غاب شي لعاب وعطى مثال بحالة نايف أكرد اللي كتحوم الشكوك فحضورو غدا ضد البرتغال.