المغرب الفاسي حطو تيكي ماتش الرجاء للبيع وعكس عدد من فرق البطولة الماص ما علنوش على مساهمتهم بفلوس التذاكر لضحايا الحوز

عكس عدد من فرق البطولة الاحترافية لكرة القدم، قرر المغرب الفاسي يطرح تذاكر الماتش ديالو المقبل اللي غيلعب فيه مع الرجاء الرياضي ضمن الجولة 3 من البطولة الاحترافية، بلاما يتبرع بالمداخيل لضحايا زلزال الحوز، فالوقت اللي قررو مجموعة من الأندية يساهمو بفلوس ماتش الجولة 3 فحملة التبرع لضحايا الفاجعة.
وحطو المغرب الفاسي برئاسة إسماعيل الجامعي، تذاكر الماتش مع الرجاء الرياضي للبيع ابتداء من 9 هذا الصباح فعدد من نقاط البيع، وغيستمر بيعها اليوم الجمعة وغدا السبت، حسب بلاغ نشرو النادي وهو البلاغ اللي ما جات فيه حتى شي إشارة للتبرع بمداخيل تذاكر الماتش لضحايا فاجعة زلزال الحوز.
وكانت عدد من الفرق الوطنية سوا فالقسم الأول أو الثاني، علنت أن مداخيل تذاكر الماتش ديالها المقبل ضمن الجولة 3 من البطولة الاحترافية، غتبرع بها لفائدة ضحايا زلزال الحوز، فالوقت اللي ما علنوش المغرب الفاسي على قرار تضامني بحال هذا، وحتى حد ما عرف واش غيعلنو عليه ولا لا.