غترجع منافسات البطولة الاحترافية ابتداء من الويكاند الجاي، بعدما كانت متوقفة خلال الأيام اللي فاتت بسبب التوقف الدولي، حيث المنتخب المغربي كان عندو 2 ماتشات الأول مع ليبيريا وتأجل بسبب زلزال الحوز، والثاني تلعب اليوم الثلاثاء ففرنسا وربح فيه بوركينافاسو. وحددت العصبة الوطنية لكرة القدم الاحترافية يوم السبت الجاي موعد لعودة ماتشات البطولة من خلال إجراء الجولة 3، وكتبقى أبرز مباراة هي اللي غيكون فيها الرجاء الرياضي ضيف عند المغرب الفاسي الأحد الجاي فتيران فاس الكبير مع 7 وربع ديال العشية. وغتعرف الجولة الثالثة تأجيل 3 الماتشات، كيتعلق الأمر بكل من نهضة بركان مع اتحاد التواركة اللي غيلعبو الأربعاء 20 شتنبر، حيث بركان عندهم كأس الكونفدرالية، وماتش ليفار مع نهضة الزمامرة اللي غيتلعب حتى هو الأربعاء 20 شتنبر، وماتش الوداد الرياضي شباب السوالم غيتلعب يوم الخميس 21 شتنبر، حيث ليفار والواك لاعبين عصبة أبطال إفريقيا. أما بالنسبة للجولة 4 من البطولة الاحترافية، غتلعب ابتداء من السبت 23 شتنبر، و ليماتش ديالها هما الرجاء الرياضي مع التواركة اللي غيلعبو يوم الاحد 24 شتنبر فدونور، وفنفس اليوم الوداد الرياضي مع نهضة بركان فبركان، وليفار لاعبين مع وجدة فوجدة الاثنين 25 شتنبر.
