واخا مزيرين.. الكوكب المراكشي غايعطيو فلوس ماتش وداد فاس لضحايا زلزال الحوز

قرر الكوكب المراكشي ينخرط فالمساهمة ماليا فحملة التبرع لضحايا زلزال الحوز، واللي ضرب الجمعة الماضي المغرب وطيح كثر من 2800 روح و كثر من 2500 مصاب.
الكوكب المراكشي وهو اكبر فريق كرة قدم بإقليم الحوز، قرر يساهم بالفلوس واخا عندو أزمة مالية مدة هادي، وكيقلب كيفاش يرجع للقسم الوطني الاول، وخصص مداخيل الماتش ديالو مع وداد فاس برسم الجولة الثالثة من بطولة القسم الثاني.
وكان الكوكب المراكشي انخرط بحالو بحالي باقي الفرق المغربية فحملة التبرع بالدم لضحايا زلزال الحوز، والمراكشيين ملي شافو مكونات الفريق جاو عطاو الدم فرحو وطلع لهم المورال فهاد الفاجعة.