زينباور مدرب الرجاء بعدما تبرع بالدم: زلزال الحوز اللي ضرب مغربنا الحبيب صدمنا وحازنين على الضحايا والعائلات

عبر الألماني جوزيف زينباور مدرب الرجاء الرياضي على الصدمة ديالو بسبب فاجعة زلزال الحوز، اللي ضرب الجمعة للي فاتت، وخطف أرواح كثر من 2000 مغربي وطيح كثر من 2050 مصاب، والحصيلة مازال قابلة للارتفاع.
مدرب الرجاء الرياضي نشر تدوينة صباح اليوم فأنستغرام تحدث من خلالها على الشعور ديالو بعد الزلزال اللي ضرب الحوز، وقال فيها: "مجتمع كرة القدم العزيز وجمهور الرجاء المحبوب، حسينا كاملين بصدمة كبيرة بسبب فاجعة الزلزال المدمر اللي ضرب مغربنا الحبيب".
وكمل مدرب الرجاء: "فهاد الوقت الصعب راه البال ديالنا حنا مدرب ولاعبين والنادي كامل مع الضحايا والعائلات ديالهم، العالم كل واقف مع الشعب المغربي فهاد اللحظة، وكنعزي من الاعماق ديالي المتضررين من الفاجعة".
للإشارة، فجوزيف زينباو مشى تبرع بالدم البارح فمستشفى محمد السادس هو ومكونات الرجاء الرياضي، بعدما جمعهم الرئيس محمد بودريقة وداهم ينخارطو بحالهم بحال جميع المغاربة فحملة التضامن مع ضحايا زلزال الحوز.