الناصيري والوداد غايتبرعو بالدم والفلوس لضحايا زلزال الحوز

انخرط الوداد الرياضي بحال باقي الأندية الوطنية فحملة التبرع والتضامن مع ضحايا زلزال الحوز، اللي ضرب الجمعة الماضي المغرب، وطيح كثر من 2000 روح و وكثر من 2000 مصاب والحصيلة قابلة للارتفاع.
وغيمشيو مكونات الوداد الرياضي برئاسة سعيد الناصيري، من لاعبين وأطقم تقنية ومسيرين اليوم الاثنين فالدار البيضاء، يتبرعو بالدم باستشارة وتحت سهر الطاقم الطبي للفريق الأحمر، وهاد الشي ضمن حملة التضامن الشعبي اللي بدات ملي وقع الزلزال.
الوداديين ما غيكتافيوش بالتبرع بالدم، ولكن غيساهمو حتى ماديا من خلال الفلوس، وناويين يحطو حتى هما مبالغ مالية مساهمة منهم بحالهم بحال كل المغاربة للتخفيف من مخلفات الفاجعة القاسية على سكان المناطق المنكوبة.