الناصيري: خاصك تعرف تسير الإدارة التقنية راه المدرب والمدير التقني ما كيرضاوش ببعضياتهم وكيضاربو

كشف سعيد الناصيري رئيس الوداد الرياضي على المشاكل اللي كيوقع فيها الفريق بسبب الصراع اللي كيكون ما بين مدرب ليكيب A والمدير التقني بالنادي، وأن حتى واحد فيهم ما كيتقبل الاخر لدرجة أنهم كيضاربو.
وتحدث سعيد الناصيري خلال المرور ديالو على "راديو مارس" وشرح وقال: "كتشوف واحد المدرب كيقوم بعمل جيد والعمل هو الركيزة الأولى فالنجاح ديالو، راه كتجيب واحد حيث كتبرك معه كتنوض على اساس راه انت رابح لاكوب ديموند، وكتمشي معه فالطرح ديالو كيقول بغيت هذا اللاعب فهذا الخط وبغيت كذا".
وكمل الناصيري: "البداية ديال السنة كانوا عندنا مجموعة من اللاعبين جبنا واحد جزائري لاكس وكان عندنا المهاجم تسومو.. واش انا اللي ما بغيتهومش؟ راه جا عموتة قاليك هذا الجوج ما يكونوش معيا.. اش غندير انا ؟.. الحاجة اللي عندي هي نحاول نفسخ معهم باش نجيب لاعبين آخرين وبركت معهم خلصتهم وها الإدارة التقنية".
وأكد سعيد الناصيري: "راه كدير إدارة تقنية، ولكن كيضارب لك المدرب مع المدير التقني، المدرب كيقولك انا هو الباطرون ديال ليكيب A، ما نبغيش شي واحد يتدخل فيا، كتصيفط له المدير التقني وغير كيقوليه شي كلمة ولا جوج كيضاربو لك، وكتولي فالمشاكل وشي ما كيرضا بشي".