عملية بيع تذاكر ماتش الرجاء والأهلي المصري بدات ووخا الخضرا محتاجة لجمهورها البدراوي مانزلش الثمن

انطلقت هاد الليلة عملية بيع تذاكر ماتش الرجاء الرياضي والأهلي المصري في إياب ربع نهائي عصبة أبطال إفريقيا واللي غيتلعب السبت الجاي بستاد دونور، وبالرغم من أن الخضرا محتاجة لجمهورنا لتجاوز خسران الذهاب بنتيجة 2 لزيرو بالقاهرة، مازال عزيز البدراوي رئيس النادي زايد في ثمن التذاكر.
وتحطو تيكي ديال ماتش الرجاء الرياضي والأهلي المصري على المنصة الإلكترونية المخصصة لبيع التذاكر، وظلت الأثمنة ديالها زايدة من 50 درهم لفوق، والبدراوي رئيس الرجاء ما نقصش الثمن واخا الخضرا محتاجة لأكبر عدد من جمهورها باش يساندها للفوز بنتيجة 3 لزيرو على الأقل من أجل التأهل لدومي فينال.
أثمنة تذاكر ماتش الرجاء والأهلي المصري تحددت في 50 درهم لزون 4 و5 و7، و100 درهم لزون 3 و2 و500 درهم لزون 1، وكتغيب زون 6 حيث مسدودة بسبب الإصلاحات حيث فيها مشكل.
عملية بيع وسحب تذاكر ماتش الرجاء الرياضي والأهلي المصري غتبقى مستمرة حتى الجمعة الجاية مع 8 ديال العشية، ويوم السبت اللي غيتلعب فيه الماتش ما كاين لا بيع لا سحب تذاكر.