برافو.. المنتخب المغربي كيواصل الاستعداد للبرازيل واللاعبين استقبلو أطفال من ذوي الاحتياجات الخاصة قبل التداريب

كيواصل المنتخب الوطني المغربي التدريبات ديالو في إطار الاستعدادات لمواجهة كل من البرازيل والبيرو وديا يومي 25 و28 مارس الجاري.
اللاعبين ديال المنتخب الوطني المغربي بداو حصة تدريبية جديدة هاد العشية مع الساعة 6 تحت إشراف الناخب الوطني وليد الركراكي بمركز محمد السادس لكرة القدم بالمعمورة، وهي الحصة الثانية لهم من بعد ديال البارح.
وكانو اللاعبين ديال المنتخب الوطني المغربي ناشطين فرحانين، وعرفت الحصة تواجد أطفال من ذوي الاحتياجات الخاصة اللي جاو يشجعوا اللاعبين ويحتافلو معهم.
هاد المبادرة جديدة كانت زوينة وماشي غير الأطفال اللي كانو فرحانين بها وهما كيتواجدو مع النجوم ديال المنتخب، ولكن حتى اللاعبين كانو ناشطين وعاجبهم الحال.