ناضت عليه الروينة.. الكاتب العام بالنيابة لوزارة الصحة اللي رفض رئيس الحكومة يعينو خدا كونجي.. ومصدر ل"گود": يقدر يطول هاد الكونجي باعفاء هاد المسؤول اللي تسبب فاحتقان بين الاطر

علمت "گود" من مصدر مطلع أن الكاتب العام بالنيابة "غير القانوني" بوزارة الصحة خدا كونجي فيه 12 يوم.
الكاتب العام خدا كونجي بعدما تناسلت الاخبار عن شكايات كثيرة توصل بها وزير الصحة ضده، وكولشي كيهضر على الاحتقان بين الاطر بسبب طريقة التعامل وسوء تدبيره للملفات الادارية وصعوبة التواصل معه.
وزير الصحة باغي يتهنا من صاحبو وسنا ليه كونجي فيه 12 يوم، ابتداء من يوم الاثنين 19 يوليوز الجاري.
شي مصادر كيهضرو بلي هاد الكونجي يقدر يطول باعفاء هاد المسؤول لللي شاد منصب اخر حساس هو مدير مديرية المستشفيات والعلاجات المتنقلة.
بوطالب، ما هو كاتب عام حقيقي وما هو بكاتب عام بالنيابة، حتى أن أحد اطر الوزارة في حديثه مع "گود"، وصفه ب"الموظف الشبح" الذي يتحكم في الصفقات ومدراء المستشفيات.