اتحاد العمل النسائي: المساعدات المادية اللي كتعطى للأسر قصات العيالات.. وخاص الحكومة تراعي مقاربة النوع

اعتبر اتحاد العمل النسائي بللي الرجال كيستحوذو على الدعم المخصص للعائلات المهمشة فهذ الأزمة ديال فيروس كورونا المستجد، وبزاف منهم ماكايستفدوش بحكم ان الرجالهم ماكايأديوش النفقة أصلا.
وقال الاتحاد، فبيان ليه توصلات بيه "كود"، بللي الحكومة فاش قررات تخصص جزء من صندوق تدبير جايحة كورونا، وتخفف التداعيات الاجتماعية بصرف 800 حتى ل1200 درهم ل"أرباب الأسر"، اعتمدات معايير كتنطبق على الرجال فالأغلبية، وما استحضراتش مقاربة النوع.
وقالت بللي 60 فالمية دالعيالات اللي كيتصلو بمراكز النجدة والاستماع ماعارفينش كيفاش يستفدو من الدعم، و90 فالمية ماعندهومش بطاقة "راميد" ومامنخارطينش ف لاسينيسيس"، وكاين فيهم اللي خدامات فالقطاع الاقتصادي غير المهيكل، وهو اللي كلا الدق بالزاف فهذ الجايحة.