دخل لكازا بالمدرعات.. واش العسكر غايعاونو السلطات المحلية باش حتى واحد ما يخرج من دارو؟

اليوم فالصباح، وغير قبل سويعات من إعلان حالة الطوارى الصحية مع 6 دالعشية، الساكنة دكازا شافت أسطول ديال الجيش داخل للمدينة على متن دبابات ومدرعات، والبعض منهم شافو مدرعات متفرقة فمختلف أحياء المدينة.
نشطاء على مواقع التواصل الاجتماعي تداولو صور وفيديوهات كثيرة للعسكر وهوما داخلين للعاصمة الاقتصادية بعشرات المدرعات، وتساءلوا على السبب.
البعض الآخر رجحو يكون التنقل ديال العسكر بهاذ الأعداد الكثيرة لكازا جاي فإطار مساعدة السلطات المحلية باش حتى واحد ما يخرج من دارو، ويمتثلو المواطنين لقرار الداخلية اللي علنات على حالة الطوارئ لبارح.
ومن المرجح المدرعات تدخل مدن أخرى من غير كازا، وخصوصا منها المدن اللي فيها كثافة سكانية كبيرة.
وحاولات "كود" تتواصل مع مصادرها فالقوات المسلحة الملكية والمكلف بالتواصل فيها باش تستفسرو على الموضوع، لكن الهاتف ديالهم صونا شحال بلا جواب.