28 إصابة تسجلات ب”كورونا” فالمغرب والوزارة مزال ما صدرات حتى بلاغ رسمي

علنات وزارة الصحة، بصورة انفوكَرافية فقط على صفحتها على “فيسبوك”، بللي عدد المصابين ب”كورونا” فيروس تزاد ب10 ديال الحالات، بمعنى أن إجمالي عدد المصابين دابا ولا هو 28 حالة، لكن الوزارة لحد الساعة مازال ماصدرات حتى شي بلاغ تذكر فيه مزيد من التفاصيل على هذ الحالات.
ومللي تسجلات الإصابة 18 ديال وزير التجهيز والنقل، لبارح فالليل، كذلك ماصدرات الوزارة حتى شي بلاغ، من جهتنا ف”كود” حاولنا نتصلو بالوزير ومدير مديرية الأوبئة والمكلف بالتواصل فوزارة الصحة، لكن الهاتف ديالهم كيصوني وحتى حد ما كيجاوب.
المغاربة من حقهم يعرفو شكون تقاص بالفيروس وفينا بلاصة باش يديرو الاحتياطات اللازمة ديالهوم ويعرفو البؤر اللي منتشر فيها الفيروس بكثرة من غيرها.
ولحد الساعة، موقع لجنة اليقظة الوبائية مبلوطي، كاين غير موقع آخر “غير رسمي” كان أكد مدير الأوبىة على مصداقيتو، اللي فيه معطيات على فين تسجلات الإصابات الثمانية اللولى (3 فجهة مراكش، و3 فجهة كازا، و1 ففاس و1 فسوس ماسة).
أما بالنسبة للبلاغ الأخير ديال الوزارة، ففيه بللي 9 ديال الإصابات لوخرا كاينة كل وحدة فيهم فالرباط وتطوان وكازا وفاس وخريبكَة، بلا حتى شي تفصيل على شحال من واحد كاين فكل مدينة.
وكيبان بحال إلى الوزارة عندها تعليمات باش ماتعطيش معلومات دقيقة على الحالات المصابة ومكانها، ممكن لأن العدد ارتفع، ومابغاتش بهذشي تخلق الهلع والخوف فصفوف الناس، ويعتابرو شي وحدين شي بللي شي مدن كتشكل بؤرة دالفيروس، وتوقع الفوضى.