إلغاء التظاهرات الرياضية والمؤتمرات.. واش المغرب كيدق ناقوص الخطر بعد ظهور أول حالة إصابة ب”كورونا”؟

المغرب استجب للنصائح اللي قدماتها اللجنة الوطنية للقيادة، واللي نصحات بضرورة تعليق الأنشطة الرياضية والثقافية الدولية فالمغرب، بعد انتشار فيروس “كورونا” المستجد (كوفيد 19)، اللي قتل الالاف ديال الناس عبر العالم، وتحديدا فالشينوا اللي بان فيها الفيروس، ثم كوريا الجنوبية، وإيران، وإيطاليا والولايات المتحدة.
البارح الاثنين علنات وزارة الفلاحة والصيد البحري والتنمية القروية والمياه والغابات وجمعية المعرض الدولي للفلاحة بالمغرب، فبلاغ مشترك ليهم بجوجد على إلغاء الدورة 15 للمعرض الدولي للفلاحة بالمغرب، واللي كان من المرتقب تنظيمها من 14 إلى 19 أبريل الجاي فمكناس.
معرض الفلاحة اللي تم إلغاءو كيستغرق كل سنة أكثر من 6 شهور باش يتم الإعداد ديالو، وكيجيو ليه مجموعة من الدول اللي كتعرض المنتوجات ديالها، وكيدخل فلوس صحيحة للدول من المستثمرين والعارضين الأجانب، وحتى الفلاحين والمزارعين الصغار المغاربة كيربحو فيه شوية وكيدورو الحركة من خلال بيع المنتوجات ديالهم لما يزيد عن مليون زائر كيجي ليه.
كذلك غير البارح علقات الجامعة الملكية المغربية للرياضات الجامعية، من بعد تلقيها لتعاليم من جهات عليا، الدورة 22 لبطولة الجامعات العالمية (كروس كانتري) اللي كانت من المقرر تدار فمراكش ف7 مارس 2020.
وكان المغرب كيستعد لتنظيم هذ التظاهرة الدولية هذي عاماين ونص، كيف ما قال عبد العزيز تخبارت، الكاتب العام للجامعة الملكية المغربية للرياضات الجامعية، فتصريح ل”كود”.
وتزامن قرار إلغاء هذ الأنشطة مع ظهور أول حالة إصابة بالفيروس فالمغرب، لمهاجر مغربي جا حديثا للمغرب من إطاليا، وتم وضعه حاليا فالحجر الصحي بالمركز الاستشفائي مولاي يوسف فكازا، وإخضاعه للعلاجات الضرورية.
رئيس الحكومة سعد الدين العثماني، فندوة صحافية دارها لبارح، مع خالد ايت الطالب، وزير الصحة، قال بللي إلغاء الأنشطة ماشي عام، بل كيكون حسب السياق، “وبطبيعة الحال الأنشطة اللي غيتم إلغاءها ماشي الوطنية اللي ماعندها علاقة بالخارج، لكن غير اللي عندها طابع دولي”.
أجانب كثار جايين من دول متعددة، وماشي حنا بوحدنا اللي اتخذنا هذ القرار لكن كاينين مجموعة من الدول اللي لغات التظاهرات ديالها الدولية لتفادي انتشار الفيروس.
وعلى الرغم من عدم الحديث عن تسجيل أية حالة للإصابة بالفيروس فندوة امس، علنات وزارة الصحة الاثنين عن تسجيل اول حالة للإصابة المؤكدة بالفيروس، وقالت فبلاغ ليها بللي “الحالة الصحية للمصاب مستقرة ولا تدعو للقلق. وأنه يوجد حاليا تحت الرعاية الصحية بوحدة العزل بمستشفى مولاي يوسف بالدار البيضاء حيث سيتم التكفل به وفقا للإجراءات الصحية المعتمدة”.