نبيلة منيب: “كورونا” مؤامرة.. وصنعاتو دولة عظمى باش تبيع دواه وتروج اقتصادها التجاري

قالت نبيلة منيب، الأمينة العامة لحزب الاشتراكي الموحد، بللي فيروس كورونا المستجد (كوفيد 19)، اللي قتل مئات الأشخاص وانتشر بشكل كبير، مصنوع فالمختبرات من طرف دولة عظمى دارتو باش تروج الدوا ديالو وتبيعو للناس فمختلف أنحاء العالم.
منيب، فلقاء ليها فالمعهد العالي للصحافة والإعلام، صرحات بللي هذ الفيروس “كيدخل فإطار نظرية المؤامرة”، حيث أنه “يتم صنع وباء ويخلقون له الدواء وقتما يشاؤون وكيفما يشاؤون من أجل الترويج التجاري للعلاج فبلادهم”.
وأكدات المسؤولة الحزبية بللي دواء كورونا كاين قبل ما يبان الفيروس، والشينوا كتبيع 70 فالمية من أدوية كتصلاح لبحال هذ الأوبئة، وهي الأدوية الموجودة فالشينوا بوحدها.
زعيمة الحزب اليساري زادت كتقول بللي الفيروس قرب يوصل للمغرب، وخاص جميع المؤسسات الحكومية تتاخد كاع الاحتياطات ديالها باش تواجهو، وماشي فقط وزارة الصحة بوحدها.
واعتبارات بللي وزارة الصحة صعيب تواجه هذ الفيروس اللي حارو معاه دول عظمى، وطالبات فنفس الوقت وسائل الإعلام باش تركز على نشر طرق الوقاية والتحسيس بخطورة الفيروس، عوض ما تنشر اخبار غير موثوقة وتخلع المواطنين.