مندوبية التامك دارت إجراءات وقائية صارمة فالحباسات باش تحارب “كورونا”

باش تحمي الحباسة فجميع المؤسسات السجنية فمختلف ربوع المملكة من فيروس “كورونا” المستجد، المديرية العامة لإدارة السجون وإعادة الإدماج اتخذات إجراءات وقائية كثيرة ابتداء من اليوم الجمعة، وطلبات من المدراء ديال الحباس باش ينسقو مع المندوبية الإقليمية للصحة فكل كبيرة وصغيرة، ويتبعو الإجراءات الصحية اللي دارت وزارة الصحة.
المديرية منعات كَاع الانشطة الثقافية والرياضية فالحبس وجميع الانشطة اللي كيختلطو فيها السجناء مع بعضهم، ونقصات من عدد الزوار ديال الحباسة والاكتفاء بزائر واحد فقط لكل حباس فمدة 15 يوما، بالإضافة للسماح للحباسة باش يعيطو لعائلاتهم فالتيليفون فالويكاند، ومنعات على الأجانب اللي كتقل مدة الإقامة ديالهم فالمغرب على 15 لعام باش يشوفوهم فخطرة.
ودارت المديرية اجراءات وقائية أخرى كثيرة عمماتها فمدكرة على كَاع موظفي السجون، أبرز ما جاء فيها: الرفع من مستوى اليقظة عند الأطباء فالسجون وجميع الموظفين وتعزيز المداومة الطبية اليومية، توعية المحابسية بمخاطر الفيروس، بالإضافة لعزل المحابسية اللي جايين من دول اخرى لمدة 14 يوم باش يتاكدو بللي مافيهمش “كورونا”، والاهتمام بالمرضى وكبار السن والدراري الصغار.
وطالبات المندوبية بعرض السجناء الجداد على الطاقم الطبي قبل توزيعهم فالغرف، وعزل اللي صرحو بللي كانوا على احتكاك بالاجانب لمدة 14 يوم.
وطالبات المديرية السجون باش يحرصو على النظافة ويعقمو الأماكن اللي كايكونو فيها السجناء مجمعين فالحانوت ديال الحبس وفالمطعم، ويعقمو الأمتعة ديالهم، ويوعوهم بأهمية النظافة ديال الحوايج ومكان الإيواء، وتفادي تجمهر السجناء بالقاعات، وتفادي لمس السجناء للكراسا والطبالي، وخاص جميع الزوار والموظفين يديرو الكمامات.