بالتصاور.. شفارة طيروا للطاروات الجداد روايضهم فكازا

استنكار كبيرة على موقع التواصل الاجتماعي “فيسبوك” بعدما تلاحو تصاور ديال طاروات عاد جابوهوم جداد فكازا، حيدو ليهم مجهولين الروايض ديالهم باش يديوهم يبيعوهم.
الطاروات الكبار، اللي جابتهم شركات “ديرشبورغ” و”أفيردا”، توزعو على مجموعة من الأحياء فكَاع المقاطعات اللي فكازا، ومن ضمنهم مقاطعة سيدي عثمان اللي وقع فيها هاذ المشكل ديال الشفرة دالروايض.
النشطاء ففيسبوك علقو على هذ التصاور وقالوا بللي “المغاربة ماتصلاح معاهم حتى حاجة زوينة”، وقالو وحدين خرين بللي “راه أكبر مشكل فهذ البلاد هو هذ الشعب”، فالوقت اللي وحدين خرين علقو كيقولوا “كيفاش بغيتي البلاد تزيد لقدام مع هذ العقليات؟”.
وقبل شي جوج سيمانات، تحركات هذ الشركات باش تنقي العاصمة الاقتصادية شوية من الزبل، وجابت كاميونات جداد وآخر ما كاين فالبركاصات والطاروات.