عائلات معتقلي “حراك الرّيف” جاو من الحسيمة لفاس بلا ميشوفو ولادهم.. والد الزفزافي: معرفناش واش ولادنا مابغاوش يشوفونا ونحملو المسؤولية لرئيس الحكومة والتامك والوكيل العام

كشف والد ناصر الزفزافي، متزعم “حراك الريف”، أن عائلات المعتقلين جات اليوم الأربعاء لفاس باش تشوف ولادها اللي نازلين ف الحبس ديال “راس الما”، لكنهم متمكنوش باش يشوفو ولادهوم.
وقال أحمد الزفزافي، في شريط فيديو مباشر نشره على الفايسبوك: “هاد الزيارة لم تجرى بسبب امتناع ولادنا عن الخروج إلينا لأسباب نجهلها، وكاين شي أسباب معارفنهاش، ومعرفانش هاد الدراري واش ميتين أو واقع ليهم شي حاجة، سيما انهم عاودو دخلو ف اضراب”.
وحمل والد الزفزافي رئيس الحكومة والمندوب العام لإدارة السجون والوكيل العام بفاس المسؤولية على هاد الوضع اللي واقع لولادهوم. واضاف: “ولادنا يتعرضون للموت البطيء وسببه شخص معروف التاريخ ديالو، وهاد السلوكيات التي تمارس على أبنائنا فقط، والدولة خاصها تشوف الحل، ولم نعرف مصير ولادنا وواش هوما مابغاوش يخرجو عندنا او هوما”.
وزاد: “أطالب من رئيس الحكومة أم يباشر اليوم قبل غدا القضية ديال المعتقلين اللي كيمتو ف راس الما، ويلا وقعات شي حاجة لولدي غادي اندير شي حاجة داخل الوطن وخارجه”.