عاجل. الركراكي ما كاينش فالبون توش الليلة والكاف سمعو ليه الصباح وقرار الاستئناف غادي يتحط غدا

غيغيب الناخب الوطني وليد الركراكي على ماتش المغرب وزامبيا اللي ملعوب اليوم الاربعاء لورون بوكو فمدينة سان بيدرو الايفوارية، ضمن الجولة الثالثة من الدور الاول لكوب دافريك، بسبب عقوبة الإيقاف من الاتحاد الأفريقي لكرة القدم على خلفية الاحداث اللي وقعت فماتش الاسود والكونكو ضمن الجولة الثانية.
حسب مصادر ل"كود" قرار توقيف الركراكي 4 الماتشات جوج موقوفة التنفيد غادي يبدا الليلة فماتش المغرب ضد زامبيا مع التسعود الليل فسان بيدرو بالكوت ديفوار عن اخر ماتش فالمجموعة السادسة.
ووفق مصادر "كود" فالركراكي استمعات ليه لجنة التأديب التابعة للكاف هاد الصباح 24 يناير 2024 بسان بيدرو٬ واضافت مصادر "كود" بان استئناف الجامعة ما يمكنش يوقف القرار٬ حقاش ما يمكن يتحط الا فالصباح غدا 25 يناير.
وتعول الجامعة على هاد القرار باش العقوبة تنزل لماتش واحد ويمكن يكون فالبون توش فالثمن. الجامعة كانت وصفات القرار بالمجحف