الكونگو متبعين الأسود قبل ماتش ديالهم ورجع لهم لاعب مهم

بدا منتخب الكونگو الديمقراطية كيوجد لمواجهة المنتخب المغربي، فالماتش اللي غيلعبوه الاحد الجاي فمدينة سان بيدرو ضمن الجولة الثانية من دور مجموعات كاس افريقيا المقامة فالكوت ديفوار.
ودار منتخب الكونگو الديمقراطية، حصة تدريبة اليوم الجمعة فتيران التداريب، خصصها مدربهم الفرنسي سيباستيان دي سابر لدراسة المنتخب المغربي بالفيديو، باش يعرفو نقاط القوة ويقلبو على شي نقاط ضعف فالمنتخب المغربي، وهذا الشي من خلال اعادة مشاهدة مقاطع فيديو د ماتش الأسود ومنتخب تنزانيا اللي ربحو الركراكي ووليداتو بنتيجة 3 لزيرو.
وديما مع منتخب الكونكو الديمقراطية خصم المنتخب المغربي فالماتش الجاي من كوب دافريك، فالكونكو غيقدرو يستافدو من اللاعب ديالهم اينونگا با، وهو مدافع أساسي كان موقف من طرف الاتحاد الافريقي لكرة القدم، وكمل العقوبة ديالو فالماتش اللي فات ديال منتخب بلادو ضد زامبيا ضمن الجولة الاولى من كوب دافريك.