بعدما مشا لإسرائيل وتعاطف معاها.. إليون ماسك كيرد على دعوة حماس باش يزور غزة

خرج الملياردير الميريكاني المعروف أيلون ماسك، مول شركة تيسلا وموقع "إكس" باش يرد على واحد الدعوة وجهها ليه مسؤول كبير فحركة حماس باش يزور قطاع غزة.
الدعوة جاتو بعدما دار واحد الزيارة مؤخرا لإسرائيل وشاف البلاصة لي كان فيها الهجوم ديال 7 أكتوبر.
وقال ماسك ف الرد ديالو: "الوضع خطير بزاف"، يعني أنه ماغاديش يقدر يمشي لتما.
فوقت سابق، عبر ماسك على التضامن ديالو مع إسرائيل وقال أنه خاصها تقضي على كاع الناس لي تسببو في الهجوم.
ولكن قال أنه خاص ميقتلوش الدراري الصغار حيت غادي ينوضو "إراهبيين آخرين"، وقال أنه خاص يتبدلو المناهج التعليمية ديال غزة باش يطلع جيل مزيان، على حد التعبير ديالو.
واخا ماسك رفض الدعوة ديال حماس، فراه قال بأنه مستعد يساهم في الإعمار ديال قطاع غزة بعد الحرب.