حصلة خايبة.. مول "إكس" دار فضيحة بسبب جوج د الحسابات كتروج للإشاعات على حرب غزة

إيلون ماسك، الملايري الميريكاني المعروف مول "إكس" لقا راسو فواحد الورطة كبيرة، بسبب ترويجو لكونطات معروفين بالفايك نيوز.
مول شركة "تيسلا"، نشر واحد التغريدة كيقول فيها للملايين من المتتبعين ديالو من العالم كامل أنهم يتبعو الأخبار لي عندها علاقة بالحرب على غزة، من واحد جوج د الحسابات.
وبعدما الناس لي فاهمين قلبو مزيان ولقاو أن هاد جوج الحسابات لي قال سي ماسك، كينشرو غير الأخبار المغلوطة، وهو شي لي خلا بزاف ديال المنظمات والدول والناس ينتاقدوه بزاف.
على حساب ماقال جورنال "واشنطون بوست" الميريكاني، فإيلون ماسك مسح التغريدة ديالو، بعدما اكتشف الحقيقة.
ولكن حتى فات الفوت، لأن أكثر من 11 مليون بنادم شاف هادشي ديالو في أقل من 3 ساعات.