علاش حيدتي ليا الكونط ديالي؟"... برلماني إسرائيلي محشمش وحرج إيلون ماسك في الزيارة اللخرة ديالو لتل أبيب

عاش الملياردير الميريكاني، إيلون ماسك، مول شركة "إكس" واحد الموقف محرج ف الزيارة ديالو الأخيرة لإسرائيل.
فالوقت التي خرج فيه ماسك من لقاء سياسيين إسرائيليين لي وجهو ليه الدعوة باش زعما يشرحو ليه الوضع تما، تعرض ليه واحد العضو ديال الكنيسيت وحرجو قدام الناس.
فالأول طلب هاد العضو ف الكنيسيت لي سميتو نسيم فاتوري من ماسك ياخذ تصويرة معاه، وشوية هو يسولو واحد السؤال غريب وقال ليه: علاش حيدتي لي الكونط ديالي؟
ماسك قلبها ضحك وبغا يهرب منو وهو يقول ليه: معرفتش وهو كيضحك.
من بعد ما نبشات الصحافة، لقات بأن صاحبنا كان كيكتب تغريدات في الموقع كيشجع فيها باش يحرقو غزة كلها، وهو الشي لي خلا الموقع يحيد ليه الكونط ديلو في خطرة.