الرجاء رجعو لتضييع النقاط بتعادل بمذاق الخسران مع السوالم.. النسور طلعو للصدارة مؤقتا وفشلو ينفاردو بها

رجعو الرجاء الرياضي لمسلسل تضييع النقاط، بعدما عجز الفريق على تحقيق الرباح فالماتش اللي لعب اليوم السبت مع شباب السوالم فتيران المحمدية، برسم الدورة 9 من البطولة الاحترافية وتعادلو زيرو لزيرو.
وما قدروش الرجاء الرياضي يوصلو لمرمى شباب السوالم طيلة 90 الدقيقة، واخا الضغط اللي داروه لاعبين الخضرا وفرص التسجيل الكثيرة اللي خلقو ولكن كان ناقصهم الفينيسيون، فالوقت اللي بقاو السوالم صامدين وجاتهم فرصة خطيرة وهي الأخطر فالماتش ديال اللاعب الساخي اللي ضربت الكورة ديالو فالبوطو، مع العلم ان الرجاء احتجو بقوة على قرار الحكم بعدم احتساب بيلانتي للفريق الاخضر فالدقيقة 87 حيث الكورة ضربت يد واحد من مدافعين السوالم.
الرجاء الرياضي بهذا التعادل السلي ضيع من جديد 2 نقاط مهمة، وضيع معها الفريق فرصة الانفراد بصدارة البطولة ولو مؤقتا، وخاد الفريق نقطة واحدة رفع بها الرصيد ديالو إلى 17 نقطة وطلع للمركز الاول اللي كيتقاسمو دابا ومؤقتا مع الجيش الملكي ونهضة بركان، أما السوالم رفعو رصيدهم إلى 8 النقاط وكيحتلو المركز 11.