الرجاء دارو حد لتضييع النقاط.. النسور ربحو التواركة فماتش صعيب وطلعو فكلاسمون البطولة

الرجاء الرياضي دار حد لمسلسل تضييع النقاط فهاد الموسم الجديد، اللي دازو منو 4 الماتشات حتى لدابا، وقدرو يربحو اليوم الاحد فستاد دونور اتحاد التواركة بواحد لزيرو فماتش صعيب بزاف، ضمن الجولة 4 من البطولة الاحترافية لكرة القدم.
وما قدروش الرجاء يوصلو لمرمى اتحاد التواركة فالشوط الأول، واخا بداو المباراة ضاغطين بخلق فرص التسجيل ولكن الفينيسيو ماكانتش وبالمقابل كانو التواركة لاعبين على الكونتر أتاك، وحتى هما غابت عليهم اللمسة الأخيرة.
الألماني جوزيف زينباور مدرب الرجاء، صعاب عليه يلقى الحلول أمام اتحاد التواركة اللي كانوا منظمين مزيان دفاعيين، وفالشوط الثاني ديار تغييرات ودخل الثلاثي زكرياء الوردي ومحمد زريدة ويسري بوزوق، وهذا الأخير قدر يماركي الهدف ديال الرباح للفريق الاخر بضربة رأسية وحط الكرة فمرمى التواركة فالدقيقة 85.
الرجاء الرياضي بهذا الرباح الصعيب قدرو اخيرا ياخدو 3 بوان بعد اخر جوج ماتشات تعادلو فيهم، ورفعو رصيدهم من النقاط إلى 8 النقاط، وكيحتلو مؤقتا المركز الثاني فالبطولة، أما اتحاد التواركة بقاو هما الخمسين وعندهم 6 النقاط.