تأهل الرجاء الرياضي إلى نهائي كأس العرش، بعدما ربح اليوم الأحد فالدومي فينال الغريم ديالو الوداد الرياضي بملعب مركب محمد الخامس بالدار البيضاء. وسالا الشوط الأول بين الرجاء والوداد بتقدم الفريق الأخضر بهدف ماركاه الودادي زولا على راسو فالدقيقة 18، بعد واحد التمريرة ذكية د لاعب الرجاء محمود بنتيك خرج لها كول الواك يوسف المطيع، وملي ضرب الكرة باش يبعدها جات فصاحبو زولا ودخلت المرمى، مع العلم أن الشوط الأول بين الفريقين كانو فيه الفرص متكافئة، حيث الفريقين بجوج جاوهم فرص التسجيل، واخا الوداد ضغطت أكثر مع نهاية الجولة باش تجيب التعادل ولكن بقات النتيجة لمصلحة الرجاء بواحد لزيرو. وخلال الشوط الثاني، حاول الوداد الرياضي بقيادة المدرب البلجيكي زفين فاندنبروك يقلب على التعادل، فالوقت اللي الرجاء الرياضي والمدرب ديالو الألماني جوزيف زينباور اعتمد على الكونتر أتاك، وكان ممكن كل فريق يماركي، واخا أن الماتش توقف بزاف الوقت بسبب كراكاج الجماهير، ولكن هذا الشي ما نقصش من حماس المباراة اللي بقى فيها التشويق حتى سلات برباح الرجاء والتأهل، واللي غيلعب الفينال مع الرابح من نصف النهائي الثاني بين نهضة بركان والفتح الرياضي، أما الوداد سالاو الموسم بعد هذا الإقصاء بزيرو لقب، حيث خسروا من قبل لقب البطولة وعصبة أبطال إفريقيا.
