طنجة خسرات مع التواركة وبدات كتطل على القسم الثاني

خسر فريق إتحاد طنجة الماتش ديالو مع ضيفو إتحاد التواركة فتيران سانية الرمل بمدينة تطوان اليوم السبت، ضمن الجولة 12 من منافسات البطولة الإحترافية لكرة القدم.
وفالشوط الأول سالا تعادل زيرو لزيرو بين الفريقين وضيع فيه إتحاد طنجة فرصة التسجيل، وفالشوط الثاني تحصل إتحاد التواركة على ضربة جزاء نجح امين زحوح فتحيولها إلى هدف فالدقيقة 69، وظلت النتجية كما هي حتى سالا الماتش.
إتحاد طنجة اللي استضاف إتحاد التواركة فتيران سانية الرمل استثناء حيث تيران طنجة كيتصل، زادت تعقدات الوضعية ديالو وخسارة اليوم مع إتحاد التواركة هي العاشرة ديال الفريق اللي مازال ماربح حتى ماتش من أصل 12 مباراة لعبها وعندو 2 نقاط من 2 تعادلات وكيحتل المركز الأخير وبدا كيطل على القسم الثاني، أما إتحاد التواركة اللي يالاه طلع هاد الموسم للقسم الأول واللي كيتعتبر من مفاجأة البطولة الإحترافية فرفع رصيدو إلى 20 نقطة من بعد هاد الرباح وكيحتل المركز الرابع.