النفتي ربح أول ماتش مع الوداد بالفوز على تطوان والحمرا قربت للصدارة

فاز الوداد الرياضي على المغرب التطواني فالماتش اللي سالا ما بين الفريقين قبل لحظات من اليوم الأحد فتيران سانية الرمل بمدينة تطوان بنتيجة 3 لزيرو لمصلحة الفريق الأحمر، ضمن الجولة 11 من منافسات البطولة الاحترافية لكرة القدم.
ومن بعدما ضيع هجوم الوداد الرياضي عدد من فرص التسجيل فالجولة الأولى، انتظر الفريق الأحمر الجولة الثانية لتسجيل 3 بيوتا ديال الرباح، وجا الهدف الأول من بعد خطأ المدافع التطواني رشدي ولاد عبد الوهاب اللي ماركا فمرمى فريقو فالدقيقة 48، والهدف الثاني سجلو زهير المترجي فالدقيقة 74، وزاد أرسن زولا الهدف الثالث للحمرا فالدقيقة 84، وظلت النتجية كما هي حتى سالا الماتش اللي توقف لدقائق فالجولة الثانية بسبب أحداث شغب فالمدرجات ما بين جماهير الفريقين.
وكيتعتبر هذا الانتصار هو الأول للمدرب المهدي النفتي مع الوداد الرياضي من بعدما خسر أول ماتش له مع الحمرا فالجولة الماضية ضد المحمدية، ومن بعد هذا الرباح رفع الواك عدد النقاط ديالو إلى 21 نقطة ورجع إلى المركز الثاني وقلص الفارق مع الصدارة إلى نقطة واحدة، أما المغرب التطواني فتجمد الرصيد ديالو عند 12 نقطة وكيحتل المركز 13.