سعيد شيبا: الماتش كان صعيب ضد باناما وحققنا رباح مهم.. الأشبال دارو اللي عليهم وها علاش خاصنا نخدمو

عبر الناخب الوطني سعيد شيبا على الفرحة ديالو بالفوز اللي حقق المنتخب الوطني المغربي لاقل من 17 عام فافتتاح مونديال U17، اليوم الجمعة على المنتخب البانامي ضمن الجولة الاولى ونوه بالأشبال واكد ان الماتش ما كانش ساهل.
وتحدث سعيد شيبا بعد فوز المغرب على باناما بنتيجة 2 لزيرو، وقال فتصريح له: "كيفما توقعنا المباراة كانت صعيبة خصوصا وأنها المباراة الاولى للوليدات وهذا الجو اللي صعيب شويا، من الناحية الفنية تحكمنا فأول 20 دقيقة ديال الماتش وجاونا فرص كثيرة ولكن للأسف ما سجلناهاش".
وزاد وضح شيبا: "من بعد بدنيا المباراة صعابت على الدراري نوعا ما، خصوصا وان المنتخب البانامي متأقلم اكثر مع هذه الاجواء ولكن قدرنا نبقاو منظمين إلى ابعد حد ونحاولو نستغلو الكرات اللي كتاح لينا وكان بإمكاننا نساليو الماتش بكري والمهم كان هي 3 اللي مهمة بالنسبة لينا فبقية المشوار".
وأكد سعيد شيبا: "الانسجام فالمنتخب موجود والجمل التكتيكية موجودة، وكيف لاحظتو كنوصلو المرمى بشكل جيد، يمكن اللعب الطويل ديال الخصم دار لينا مشاكل وخصنا نخدمو على هذا الشي فالماتشات الجايين.. الكتلة موجودة خاص غير عملية التأقلم نتمناو بدنيا مع تقدم البطولة نولفو اكثر هذا الجو ونتعاملو ذكاء معه".