الركراكي: علاش كتهضرو ليا غير على سفيان رحيمي؟ كاين شحال من لاعب غيرو يستاهل يكون فالمنتخب راه بوفال وما عيطش له

اعتبر الناخب الوطني وليد الركراكي أن النقاش اللي داير على عدم الاستدعاء ديالو المتواصل لسفيان رحيمي نجم العين الإماراتي خدا حجم كبر من لاعبين آخرين حتى هما مقدمين مستويات مزيانين ولكن ما كيعيطش لهم، وأكد أن النجم الرجاوي السابق عندو حظوظ باش يكون فكوب دافريك فالكوت ديفوار مع ليكيب ناسيونال.
وتحدث وليد الركراكي وقال: "بالنسبة لسفيان رحيمي ملي كتشوف لاليست وكتشوف اللاعبين اللي ما كينينش، راه سفيان رحيمي ممكن تكون عندو فرصة، ولكن علاش ما كتهضروش على مراد باتنة وعلاش ما كتهضروش على لاعبين آخرين اللي حتى هما يستاهلو، سفيان رحيمي يستهال يكون فالمنتخب الوطني المغربي ويقدر يكون معنا فكوب دافريك، إذا بقى مكمل فالمستوى ديالو".
وكمل الركراكي: "مراد باتنة من أحسن اللاعبين فالبطولة السعودية ويستاهل بحالو بحال بزاف ديال اللاعبين ولكن لاليست هي هادي، حتى أنا كنغلط.. اليوم اللاعبين اللي عندي فالجناب بحال الزلزولي وسفيان ديوب وأمين عدلي صغار فالسن وحكيم زياش اللي عندو التجربة وكاين سفيان بوفال اللي ما عيطش له ويستاهل حيث عطانا فكوب ديموند وعندو ما يقول".