بنزينة ل"كود": كنا عيالات وقادات فالتيران ولاعبات المغرب أكدن أن المراة المغربية قادرة تنجح فجميع المجالات

عبرت نهيلة بنزينة لاعبة المنتخب الوطني المغربي على الفرحة ديالها بتأهل اللبؤات إلى ثمن نهائي كاس العالم للعيالات 2023، بأستراليا ونيوزيلاندا، بعد الفوز على كولومبيا اليوم الخميس فالجولة الثالثة من دور المجموعات، وأكدت أنها هي وصحباتها، كن عيالات وقادات فالتيران وأن المرأة المغربية قادرة تنجح فكل المجالات.
وتحدثت نهيلة بنزينة فتصريح لموقع "كود" بعد الماتش بين المغرب وكولومبيا وقالت: "واخا نحاول ما غنقدرش نوصف شحال الفرحة اللي فقلبي، فرحانة براسي وبالبنات الله يعطيهم الصحة، تقاتلنا وكنا عيالات فالتيران والمرأة المغربية تقدر تنجح فجميع المجالات، وربحنا".
وزادت وضحت بنزينة: "واخا كن ما تأهلناش كنا معولين نديرو ماتش تاريخي، ما فكرناش فماتش ألمانيا وكوريا، كان هدفنا نربحو كولومبيا وصافي وهذا الشي جيد علينا الستريس".